巨子 ICON - 財經股票資訊及專家分析
快訊
資訊
    虛擬市場
    專家

    快訊

    資訊

    珍寶沉沒了 昔日「歌堂躉」慘遭拋棄 典型蝕本生意無人做|刁佬

    珍寶沉沒了 昔日「歌堂躉」慘遭拋棄 典型蝕本生意無人做|刁佬

    政府宣佈海洋公園唔接手珍寶海鮮舫後,晚上廚房就入水傾側,彷彿條船都有靈性知道自己唔捱得幾耐,一拖出去西沙群島仲沉沒埋。普通市民抌件大型垃圾如傢私,都要花啲皮費拎去垃圾站,再大型啲可能要搵廢棄物處理公司。珍寶海鮮舫咁大條船,原本棄置都要諗諗辦法,珍寶海鮮舫的結局實在很戲劇性,殊不知它已自行了斷。

    珍寶海鮮舫母公司為香港仔飲食集團,該集團大股東為新濠國際發展(0200)。1993年6月,新濠國際以4.35億元收購香港仔飲食集團86.68%股權,持有至今,於2020年6月新濠國際曾提出以4,975萬元私有化香港仔飲食集團,但是未達收購所需的門檻,最終失敗。

    踏入第三年疫情,通關一延再延,食肆開下又閂,就算政府有保就業措施支持,食完補貼唔捱得幾耐最終都係要炒人。珍寶海鮮舫食正旅遊及食肆的行業低潮,係人都知呢段時間無得做。就算政府減下排污費,都係杯水車薪,計及檢查、維修、保養及停泊費等,還有滿足牌照及其他要求,每年的固定支出不輕,加上珍寶海鮮舫收入大減,短時間又未見曙光可扭轉收入頹勢,實在長貧難顧。

    新濠主營業務係博彩業,精於計算賠率及派彩,繼續經營珍寶海鮮舫,件事值唔值博,心中有數。「殺頭生意有人做,蝕錢生意無人做」如果經佢地屈指一算,決定免費送畀你,證明無得做,連棄置費用都慳返。

    偏偏政府於2020年《施政報告》提出「躍動港島南」項目,推動海洋公園協作重新活化海鮮舫。海洋公園自身已有經營困難,搵個泥菩薩打救珍寶海鮮舫,不知是諷刺,還是打從第一日開始就有心要敷衍新濠的一片好意。

    如果政府覺得珍寶海鮮舫值得保育,一早就已將佢納入「活化歷史建築夥伴計劃」。一向做開水魚的政府今次都醒,深明便宜莫貪,海洋公園亦表明「任何相關安排不能為公園帶來額外的財政負擔」。

    呢個世界往往免費嘅嘢先係最貴,無條件送給的先至貴,純潔的男女感情係免費,兄弟朋友的患難真情亦都係免費,刁佬眼見用錢買到的有數計,貴極有限,純付出真感情因為稀有所以很貴,很是珍貴。珍寶海鮮舫對政府未必付出真感情,但要養住佢就肯定貴。

    【財經專欄】刁場奇幻錄刁佬

    簡介:遊走在中環黑白之間,自覺是個穿著西裝的古惑仔,在波詭雲譎的金融市場中,鑽研刀不血刃的秘訣。

    免責聲明︰以上內容僅代表作者的個人立場和觀點,不代表香港01的任何立場,香港01亦無法核實上述內容的真實性、準確性和原創性。

    另外,以上純屬個人研究分享,並不代表任何第三方機構立場,亦非任何投資建議或勸誘。讀者務請運用個人獨立思考能力自行作出投資決定。

    本文由《香港01》提供

    於本流動應用程式(App)或服務內所刊的專欄、股評人、分析師之文章、評論、或分析,相關內容屬該作者的個人意見,並不代表《香港01》立場。